BE-ja thotë se dialogu duhet të udhëhiqet nga Thaçi

Bashkimi Evropian ia ka bërë të qartë Qeverisë së Kosovës se në çfarë niveli ka filluar dhe duhet të vazhdojë dialogu Kosovë-Serbi. Këtë kryeministrit të Kosovës, Ramush Haradinaj i është bërë e ditur përmes një letre dërguar nga përfaqësuesja e lartë e BE-së, Federica Mogherini, komisionerja për tregti, Cecilia Malmstrom, si dhe komisioneri Johannes Hahn, përcjell albinfo.ch.

Aty thuhet se dialogu Kosovë-Serbi nga pala kosovare udhëhiqet nga presidenti Thaçi.

Përfaqësuesit e BE-së në këtë letër shkruajnë se rezoluta e miratuar nga Kuvendi i Kosovës është një zhvillim i rëndësishëm dhe do të kontribuojë për ta forcuar peshën e autoriteteve të Kosovës.

Por ata e akuzojnë Haradinajn se me vendimet e njëanshme është duke rrezikuar përparimin që është arritur në këtë dialog.

“Ne fuqimisht nuk pajtohemi me vlerësimin tuaj se dialogu po ngecë. Përkundrazi, dialogu i udhëhequr nga dy presidentët po shënonte dhe ka shënuar progres të qëndrueshëm. Ne e kemi ndarë këtë vlerësim me liderët e BE-së në Këshillin Evropian këtë dhjetor dhe kemi marrë mesazhe inkurajuese të përkrahjes”, thuhet në këtë letër.

Po ashtu në letër përfaqësuesit e BE-së shprehin keqardhjen e tyre për faktin se Kosova “nuk e ka marrë në konsideratë” ofertën që ka bërë BE-ja për të adresuar heqjen e taksave për mallrat nga Serbia dhe Bosnja e Hercegovina.