BE: Pezullohen programet e vaksinimit

FOTO: APA/GEORG HOCHMUTH

Ministri i Shëndetësisë, Jens Spahn, paralajmëroi në Twitter që Gjermania do të kalojë javë të vështira me mungesa të vaksinave kundër Covid-it, ndërkohë qeveria po bën përpjekje që të sigurojë dozat e nevojshme për muajt në vijim. Qeveria gjermane po merr në konsideratë organizimin e një samiti ndërmjet ministrave federalë, liderëve rajonalë dhe kompanive farmaceutike, në mënyrë që të përshpejtojë përpjekjet e tyre, shkruan Euronews, përcjell Albinfo.ch.

Çështjen e prokurimit të vaksinave e përditshmja gjermane BILD e konsideron si një ‘skandal’. Ndërkohë, Komiteti gjerman i Vaksinimit deklaroi gjatë ditës së sotme që vaksina AstraZeneca do t’i injektohet vetëm individëve nën 65 vjeç. Kjo sepse nuk ka të dhëna të mjaftueshme për efektivitetin e saj në individët mbi këtë moshë.

Autoritetet në Spanjë kanë pezulluar injektimin e të gjitha dozave të para të vaksinave për së paku 2 javë, për shkak të mungesave të tyre.

Para disa ditësh, kompania britanike AstraZeneka u shpreh që po haste probleme me prodhimin e vaksinave në degët e saj evropiane, gjë e cila donte të thonte që nuk mund të shlyente premtimet për Unionin. Por BE thotë që firma duhet të plotësojë detyrimet e saj, duke marrë nga sasitë që ajo ka në Britani.

Ndërkohë BE ka miratuar blerjen e 300 milionë dozave të vaksinave nga Pfizer/BioNTech në dhjetor. Por kompania nuk ishte në gjendje të siguronte 12.5 milionë dozat e vaksinave të premtuara në fund të vitit 2020, për shkak të çështjeve në prodhim.

Disa vende kanë siguruar më shumë doza të vaksinave sesa vendet e tjera. Ndonëse Shtetet e Bashkuara dhe Kina kanë numrin më të madh të dozave të vaksinave në total, Britania, Izraeli dhe Emiratet e Bashkuara Arabe kanë aktualisht sasinë më të madhe të vaksinave në përpjesëtim me numrin e popullsisë.