BE: Ka rrezik për trafikim të fëmijëve ukrainas

(KEYSTONE/Martin Ruetschi)

Komisionerja e Bashkimit Evropian për migracionin paralajmëroi të hënën se fëmijët ukrainas ka rrezik të trafikohen.

Ylva Johansson tha në një konferencë shtypi në Estoni se rreth gjysma e 3.3 milionë ukrainasve që kishin ikur në vendet e BE-së që nga fillimi i luftës ishin fëmijë.

Ukraina ka një numër të madh jetimësh dhe fëmijësh të lindur nga nëna surrogate që nuk ishin marrë nga prindërit e tyre. Kjo rrit rrezikun që ata të rrëmbehen ose të bëhen viktima të birësimeve të detyruara, tha ajo.

“Ekziston një rrezik i madh që fëmijët të trafikohen”, tha ajo.

Deri më tani ka pasur shumë pak fëmijë të pashoqëruar të raportuar në kufijtë e BE-së, tha ajo, dhe disa raportime për trafikim, shkruan “Reuters”, përcjell albinfo.ch.