Biden uron Kosovën, thotë se dialogu duhet të përfundojë me njohje

Presidenti amerikan Joe Biden ka dërguar telegram urimi me rastin e përvjetorit të Pavarësisë së Kosovës.

Lajmin e ka bërë të ditur presidentja e vendit, Vjosa Osmani, njofton Albinfo.ch.

“Jam e lumtur ta ndaj me ju urimin e Presidentit Biden për Ditën e Pavarësisë së Kosovës – 17 Shkurtin, në të cilin ai potencon se Shtetet e Bashkuara mbesin partner i palëkundur i Kosovës”, shkruan presidentja Osmani

Presidenti Biden në këtë urim duartroket punën dhe përkushtimin tonë për forcimin e demokracisë dhe në luftën kundër krimit e korrupsionit, teksa kërkon që dialogu të përqendrohet në njohje reciproke. Sipas tij, në Samitin për Demokraci Kosova ka dëshmuar se është e gatshme ta ndajë përvojën me shtete të tjera, ndaj thekson se gjatë këtij viti Kosova vazhdimisht ka treguar lidership në arenën ndërkombëtare. Në urimin e tij, Presidenti Biden ka përsëritur faktin e lidhjes së veçantë, të cilën familja Biden e ka me vendin tonë.

Kosova është e bekuar ta ketë në krah aleatin e saj të përhershëm, Shtetet e Bashkuara të Amerikës!

Zoti e bekoftë miqësinë e Kosovës me ShBA-në!, shkruan presidentja Osmani.

 

---