Bie numri i refugjatëve të Kosovës në Hungari

Po vazhdon rënia e numrit të kosovarëve që kalojnë ilegalisht kufirin Serbi-Hungari. Këtë konstatim e jep Policia kufitare e qytetit hungarez Çongrad.

Kjo polici dje ka kapur 113 njerëz të cilët po tentonin të kalonin ilegalisht kufirin, çka është më pak për dallim nga javët e kaluara kur kufirin e kalonin deri 300 persona në ditë trasmeton kosovapress.

Nga këta 113 të zënë dje, vetëm shtatë janë nga Kosova, ndërsa tjerët kryesisht janë nga Siria, Afganistani dhe Bangladeshi, ka thënë zëdhënësi i Policisë në Çongrad.

Në këtë javë numri i atyre që tentuan të kalojnë kufirin serbo-hungarez ka shkuar mes 113 deri në 280, përderisa në javët e shkuara ky numër ka shkuar prej 300 deri në 1000.