BIK-u preferon rrugën institucionale

Kryesia e Bashkësisë Islame shpreh gatishmërinë për respektimin e rrugës institucionale në zgjidhjen e çështjeve kontestuese

Bashkësia Islame e Kosovës, nëpërmjet një komunikate, ka reaguar ndaj zhvillimeve të fundit që ndërlidhen me realizimin e të drejtave fetare në vend, të cilat, siç thuhet, kanë të bëjnë me të drejtën e shkollimit në sistemin publik për nxënësit që bartin shaminë, futjen e edukatës fetare në shkolla, ndarjen e vendit për xhaminë në Prishtinë.

Në komunikatën e BIK-ut thuhet se kryesia e Bashkësisë Islame të Kosovës angazhohet që të realizohen të gjitha të drejtat e besimtarëve, e para së gjithash e drejta për shkollim, punësim, arsimim e vend dinjitoz për xhami.

“Konsiderojmë që këto të drejta janë legjitime dhe në bashkëpunim me institucionet e vendit do të gjejmë zgjidhje ligjore e kushtetuese”, ka thënë BIK-u.

Gjithashtu BIK-u, ka deklaruar se nuk mbështet dhe as që do të mbështesë “asnjë lloj proteste, manifestimi, qëndrimi a platforme politike, që është bërë dhe shfaqur kohëve të fundit”.

“Kryesia e Bashkësisë Islame shpreh gatishmërinë për respektimin e rrugës institucionale dhe jemi të bindur që institucionet tona me përgjegjësi do të kryejnë detyrat e veta”, thuhet ndër të tjera në komunikatën e BIK-ut.