‘Binjaku i humbur’ i Trudeaus në Afganistan  

Njëri prej garuesve në një talent-show afgan papritur u shndërrua në yll, shkaku i ngjashmërisë së madhe që ka me kryeministrin kanadez, Justin Trudeau.  

Abdul Salam Maftoon, këngëtar i dasmave nga një fshat shumë rural në provincën Badakhstan, as që kishte dëgjuar për njeriun me të cilin ngjan, derisa njëri prej anëtarëve të jurisë në talent-showin Afghan Star ia përmendi këtë.

Fizikisht i fuqishëm, me fytyrë të gjatë dhe flokë të errëta, Maftoon, 29-vjeçar, shpreson që krahasimi me njërin prej liderëve më seksi aktualisht në botë do t’i sjellë më shumë vota në versionin afgan të American Idolit.

“Njerëzit e harruan fare emrin tim dhe tani më quajnë vetëm Justin”, tha Maftoon për AFP-në, përcjell Albinfo.ch.

“Nuk dija asgjë për të derisa e pashë në rrjete sociale”, tha afgani. “Ngjashmëria me të i rriti gjasat e mia për të fituar”.  

Një video e jurisë në këtë spektakël është parë mijëra herë në Youtube. Afganët tani shpesh bëjnë shaka që Maftoon është vëllai i humbur binjak i kryeministrit kanadez.

Sidoqoftë, Maftoon është në mesin e tetë garuesve që mund të kalojnë në fazën finale të spektaklit.  Dhe, derisa Maftoon pak ka gjasa që të mund të shkojë në Kanada, ai shpreson se një ditë megjithatë do ta takojë disi Tredaun.