Bisedimet Prishtinë-Beograd, në fillim të marsit në Bruksel

Bisedimet do të jenë të vështira, do të kenë rënie e ngritje dhe do të zgjatin aq sa të mund t'i zgjidhim problemet më të rëndësishme

Shefi i ekipit negociator të Serbisë, Borislav Stefanoviq ka vlerësuar sot se bisedimet me Prishtinën do të jenë të vështira dhe mjaft të gjata, me batica dhe zbatica sa për t’i zgjidhur çështjet më të rëndësishme.

Sipas Stefanoviqit, bisedimet Prishtinë-Beograd mund të fillojnë në gjysmën e parë të marsit në Bruksel.

“Çdo çështje ka nivelin e lartë të vështirësisë për t’u zgjidhur dhe nuk duhet pasur pritje jorealiste. Ato do të jenë bisedime të vështira, që do të kenë rënie e ngritje dhe do të zgjatin aq sa të mund t’i zgjidhim problemet më të rëndësishme”, ka deklaruar Stefanoviq për mediat serbe.

Stefanoviq ka thënë se fillimisht do të shqyrtohen çështjet që më së shumti i rëndojnë njerëzit në Kosovë, siç janë çështjet e lirisë së lëvizjes, shfrytëzimi i telefonisë celulare, energjisë elektrike, targave të makinave dhe personave të zhdukur.

Duke komentuar emërimin e zëvendëskryeministres Edita Tahiri si shefe të ekipit të Kosovës, Stefanoviq ka thënë se ajo është negociatore me përvojë dhe prandaj pritet të jepet mundësia “për zbatimin e plotë të asaj që do të biem dakord”.