Bizneset private nuk do paguajnë TVSH pa e shitur mallin

Hamza tha se politikat e reja fiskale kanë hyrë në fuqi që nga 1 janari i këtij viti, ndërsa në strategjinë e politikave fiskale është edhe kalimi i TVSH-së nga kufiri në brendi

Që nga sot, bizneset private në Kosovë nuk do të paguajnë TVSH-në ende pa e shitur mallin e tyre, pasi që nga 1 janari i këtij viti ka filluar implementimi i politikave të reja fiskale. Këtë e bëri të ditur ministri i Financave, Bedri Hamza pas një takimi që pati me përfaqësues të Asociacionit të bizneseve në Kosovë, ku u bisedua për politikat e reja fiskale dhe ndikimin e tyre të të bërit biznes.

Hamza tha se politikat e reja fiskale kanë hyrë në fuqi që nga 1 janari i këtij viti, ndërsa në strategjinë e politikave fiskale është edhe kalimi i TVSH-së nga kufiri në brendi, gjë që do të ndikojë pozitivisht për sektorin privat në vend, përcjell kp. Ai theksoi se tashmë ka mbetur që bizneset të marrin dokumentet e nevojshme në mënyrë që më pas të lirohen nga lënda bazë.

Kryetari i Odës Ekonomike të Kosovës, Safet Gerxhaliu, tha se agjenda ekonomike nuk ka alternativë dhe se është jashtëzakonisht e rëndësishme që po krijohen kushte për zhvillimin e sektorit privat, përkatësisht sektorin prodhues.