Bllokimi për pandeminë ka ulur shpenzimet e shëndetësisë në Zvicër

Shpenzimet, gjatë bllokimit dhe në katër javë pas kësaj kishin rënë për 22.4 për qind

Pandemia Covid-19 ka bërë që kostot shëndetësore të bien nën nivelet e pritura nga kompanitë e sigurimit shëndetësor në valën e parë, në pranverën e vitit 2020.

Shpenzimet, gjatë bllokimit dhe në katër javë pas kësaj kishin rënë për 22.4 për qind, shkruan srf.ch. Në vlerat e pritshme ishte përfshirë tashmë rritja e kostove, njofton instituti i sigurimeve shëndetësore CSS.

Për këtë arsye, nga të dhënat në fjalë nuk duhet kuptuar se kostot e kujdesit shëndetësor kanë rënë me të vërtetë, transmeton albinfo.ch. Në fakt ajo që vihet në dukje këtu është se kostot nuk janë rritur aq sa ishte pritur se do të rriteshin pa pandeminë.

Instituti i siguruesit shëndetësor, duke kërkuar arsyen kryesore të ndryshimit midis pritjeve dhe shpenzimeve në sferën e shëndetësisë, atë e gjen në bllokimin e dekretuar nga Këshilli Federal, në pranverën e vitit 2020.

Në atë kohë, spitalet hiqnin dorë nga operacionet e planifikuara në mënyrë që të mbanin shtretërit e kujdesit intensiv të lirë për pacientët me Covid-19, përcjell albinfo.ch. Po kështu edhe fakti se kishte kufizime të lëvizjes ka ndikuar në zvogëlimin e kostove shëndetësore gjatë pandemisë.

---