BQK-ja thotë se kartoni i gjelbër po shitet nga njerëz të palicencuar

Banka Qendrore e Kosovës u ka bërë thirrje vozitësve që të kenë kujdes me blerjen e katronit të gjelbër.

Paralajmërimi i BQK-së vjen pasi e njëjta është njoftuar se në Kosovë, kartoni i gjelbër po shitet nga persona, që nuk kanë asnjë leje për të bërë një gjë të tillë edhe përmes rrjeteve sociale, përcjell albinfo.ch.

“Për më tepër, asnjë kompani sigurimi, e pajisur me licencë nga BQK-ja, dhe asnjë person fizik apo juridik i jashtëm, nuk ka të drejtë të shes një produkt të tillë në Kosovë, derisa Byroja Kosovare e Sigurimit të bëhet anëtare e Këshillit të Byrove, apo pa lejen e Këshillit të Byrove dhe BQK-së. BQK njofton qytetarët se blerja e kartonit të gjelbër nga persona të palicencuar është me rrezik, derisa asnjë institucion nuk i mbikëqyr dhe kontrollon këta persona, dhe në rast të lindjes së ndonjë kontesti apo shkaktohet ndonjë humbje, BQK-ja nuk mund të marrë asnjë përgjegjësi lidhur me këtë”, thuhet në komunikatë.

Byroja Kosovare e Sigurimit akoma nuk është anëtare e Këshillit të Byrove, prandaj asnjë sigurues në Kosovë nuk ka të drejtë shitjen e kartonit të gjelbër.