Britania e Madhe prezanton tri nivelet e emergjencës ndaj pandemisë

Mbretëria e Bashkuar prezantoi planin e ri ndaj pandemisë koronavirus.

Kryeministri Boris Johnson, duke iu adresuar ligjvënësve në Dhomën e Komunave, bëri me dije se nuk do të ketë izolim të ri kombëtar dhe as mbyllje të shkollave e universiteteve, por një ndërhyrje me tri nivele, sipas shkallës së përhapjes së infeksionit.

“Nuk mund të lejojmë që sistemi ynë shëndetësor të kalojë në kolaps. Do të jenë muaj të vështirë, por do të mund t’i kalojmë”, tha kryeministri.

Niveli mesatar i alarmit do të përfshijë gjithë Britaninë dhe konsiston në kufizimet që janë aktualisht në fuqi, si grumbullimi i jo më shumë se 6 personave dhe mbyllja e bizneseve pas orë 22:00.

Niveli i lartë do të shtojë më tej kufizimet dhe ndërhyrjen e autoriteteve, duke ndërprerë transmetimin e COVID-19. Ndërsa shpallja e nivelit shumë të lartë do të nënkuptonte kufizimin e takimeve publike dhe private mes qytetarëve dhe mbylljen e plotë të bareve e pub-eve.

Qeveria e Johnson do të garantojë dhe një paketë financiare prej rreth 1.4 miliardë euro për të ndihmuar bizneset që do të preken nga këto kufizime.