Britanikët dhe francezët kundër ndarjes së Kosovës

Ambasadori britanik tha se agjenda e bisedimeve Prishtinë – Beograd përfshinë çështjet praktike dhe jo ato të ridefinimit të kufijve

Dialogu Prishtinë – Beograd nuk mund të rrëshqas në çështjen e ndarjes së Kosovës, kanë deklaruar ambasadorët e Britanisë së Madhe dhe Francës.

Ambasadori britanik Jan Klif dhe ai francez Zhan Fransua Fitu, gjatë paraqitjeve të ndara për media, në Prishtinë, thanë se statusi i Kosovës dhe kufijtë e saj janë çështje e mbyllur dhe nuk mund të rihapen për diskutim, raporton REL.

Nëse Serbia do të kërkonte hapjen e bisedimeve për ndarjen e Kosovës, këshilla britanike për qeverinë në Prishtinë do të ishte t’i refuzonte këto bisedime, tha ambasadori i Britanisë së Madhe, Jan Klif. Këto komente, ambasadori Klif i ka bërë gjatë një panel-diskutimi të organizuar nga lëvizja Fol.

Ambasadori britanik tha se agjenda e bisedimeve Prishtinë – Beograd përfshinë çështjet praktike dhe jo ato të ridefinimit të kufijve. E në rast se Serbia zyrtarisht do ta ngriste këtë çështje, ai tha se nuk ka nevojë të pranohet të diskutohet për këtë temë.

Diplomati francez ritheksoi se ideja e ndarjes së Kosovës nuk është në “lojë”, dhe se asnjë vend evropian nuk e përkrah idenë e ndarjes.

Ai ka komentuar edhe procesin aktual të bisedimeve dhe paralajmërimet që takimi i radhës i paraparë për mesin e qershorit mund të shtyhet.