Buehler: krimi në veri financon radikalët

"Nuk mund t’i bindni njerëzit jashtë Kosovës se situata e sigurisë është stabile nëse ka ushtarë nëpër rrugët e qytetit"

Komandanti i KFOR-it, gjenerali gjerman Erhard Buehler ka thënë se situata në veri dallon prej pjesëve tjera të Kosovës, ngase atje për shumë vite janë vendosur strukturat e krimit të organizuar.

“Kjo strukturë radikale përbën kërcënim real për një mjedis të sigurt dhe stabil. Nuk flas këtu për popullatën në përgjithësi dhe për shumicën e madhe të qytetarëve, ka thënë ai në një intervistë për gazetën “Koha Ditore”.

Qytetarët janë të ndershëm dhe të qetë. Unë nuk po them këtu se kjo është një pjesë ku vetëm kriminelët jetojnë. Kjo kurrsesi nuk është ashtu”, ka thënë Buhler.

Sipas tij, nga krimi i organizuar në veri financon strukturat radikale në këtë pjesë të Kosovës.

Ai po ashtu ka thënë se “në një afat të gjatë duhet të vijmë në një situatë kur nuk do të ketë ushtarë të armatosur dhe në uniformë gjithandej Kosovës. Nuk mund t’i bindni njerëzit jashtë Kosovës, përfshirë edhe investitorët potencialë, se situata e sigurisë është stabile nëse ka ushtarë nëpër rrugët e qytetit”.