Buja premton formimin e Ministrisë për Diasporë

"Duke marrë parasysh numrin e madh të shqiptarëve nëpër botë, duhet të kemi edhe Ministrinë e Diasporës"

Ministri i Arsimit, Shkencës dhe Teknologjisë (MASHT), Ramë Buja është zotuar sot se do të punojë në hapjen e një ministrie për diasporën, duke marrë parasysh numrin e madh të shqiptarëve, të cilët jetojnë në shtete të ndryshme të botës, transmetojnë agjensitë e lajmeve në Kosovë.

„Insistimi ynë do të jetë që të kemi një ministri për diasporën tonë, tani është një agjenci. Mirëpo, meqë kemi një diasporë aq të madhe ja vlen barra qiranë që të kemi një ministri që do të interesohet për të gjithë ata kudo që janë”, ka thënë Buja

Këto komente ministri kosovar i bëri të hënën në Prishtinë, gjatë një takimi me nxënës dhe mësues shqiptarë të shkollës shqipe të mësimit plotësues në diasporë, të cilët jetojnë në Suedi.

Ai iu ka thënë atyre se është shumë me rëndësi që ata ruajnë gjuhën dhe kulturën tonë.

Po ashtu ka premtuar se do të kenë mbështetje institucionale të gjitha projektet që promovojnë dhe ruajnë kulturën shqiptare .

Rreth 60 nxënës shqiptarë që jetojnë në Suedi po qëndrojnë në një vizitë në Kosovë.

Ekskursioni i nxënësve shqiptarë nga Suedia ka karakter mësimor dhe është koordinuar nga MASHT-i, ndërsa nikoqirë formalë janë drejtoritë komunale dhe shkollat homologe.