Cassis, kandidat i liberalëve të Tiçinos për pasues të Burkhalter-it në qeveri

Cassis është deputet nacional dhe njëherësh kryetar i Grupit Parlamentar të FDP-së në Dhomën Nacionale të Parlamentit të Zvicrës  

Keystone

Dorëheqja e paralajmëruar e ministrit nga FDP/PLR-ja, Didier Burkhalter ka ngjallur një garë në mesin e kuadrove të kësaj partie për ta zënë vendin që do të mbetet vakant në Këshillin Federal. Kështu, në Zvicrën frankofone janë përfolur tashmë disa kandidatura për këtë post.

Mirëpo, duke qenë se kantoni Tiçino, që është i vetmi regjion italishtfolës, që nga viti 1999 nuk është përfaqësuar me ministër në qeveri, ekziston një pritje që pasuesi i Burkhalterit të vijë nga ky kanton, shkruan albinfo.ch. Kështu FDP e Tiçinos e ka marrë të martën vendimin përfundimtar që për vendin vakant të kandidojë politikanin e saj Ignazio Cassis.

Mbi bazën e propozimit të udhëheqjes së partisë, delegatët kanë vendosur dje që për përfaqësues në qeverinë e vendit të fusin në garë politikanin e përmendur. Cassis është deputet nacional dhe njëherësh kryetar i Grupit Parlamentar të FDP-së në Dhomën Nacionale të Parlamentit të Zvicrës.

Sipas FDP-së së Tiçinos, Cassis-i 56 vjeçar sjell në ekzekutivin e vendit cilësitë e duhura për këtë post dhe si i tillë ka shanset më të mëdha për t`u zgjedhur.

Por, vendimin për zgjedhjen e kandidatit të vetëm për Këshill Federal, e merr Grupi Parlamentar i FDP/PLR në mbledhjen e tij që mbahet më 1 shtator, transmeton aklbinfo.ch. Ai do të vendosë se cilin kandidat do t`ia propozojë asamblesë parlamentare (dy dhomat e parlamentit) në mbledhjen që ajo do të mbajë më 20 shtator të këtij viti.

Kryetarja e FDP/PLR-së, Petra Gössi deri tash është shprehur që partia e saj të dalë para asamblesë me dy kandidatë.