Çeku: Veriu i Kosovës nuk mund të ndahet

Ministri i Forcës së Sigurisë, Agim Çeku, ka deklaruar se veriu i Kosovës nuk mund të ndahet. Sipas tij ajo që bëri qeveria kur mori në kontroll dy pikat doganore në veri nuk ishte një çështje politike, por ishte çështje e sigurisë.

Ministri Çeku i ka deklaruar Zërit të Amerikës se qeveria demonstroi se ky nuk ishte një aksion kundër popullsisë serbe në veri, sepse ajo ofroi ndihmë humanitare për banorët nëse kjo do të ishte e nevojshme.

Çeku ka theksuar se Qeveria e Kosovës është për zgjidhjen e problemeve me dialog, por çështja e kufirit nuk mund të negociohet. “Qeveria e Kosovës ka të drejtë të vendosë kontrollin e saj në të gjithë vendin”, ka theksuar ministri.

Çeku ka thënë se problemi i veriut të Kosovës mund të zgjidhet duke i bërë trysni Beogradit të ndalë financimin dhe nxitjen e popullsisë me përkatësi etnike serbe që jeton në veri.