Cilat qytete zvicerane janë më të përgjegjshme nga pikëpamja sociale?

Pixabay, Ilustrim

Një studim i kryer nga OJQ Solidar Suisse kërkoi të zbulonte nëse njerëzit që jetojnë në Zvicër ndiejnë një ndjenjë përgjegjësie sociale ndaj blerjes vetëm të atyre produkteve që prodhohen në mënyrë të qëndrueshme nga fuqia punëtore e trajtuar në mënyrë të drejtë.

Qëllimi i anketës është të rrisë vetëdijen për përgjegjësitë që kanë komunat ndaj të drejtave të punëtorëve si dhe ndikimin ekologjik të blerjeve të tyre.

“Me një shumë prej 16 miliardë frangash, komunat zvicerane ushtrojnë një ndikim të drejtpërdrejtë në zinxhirët globalë të prodhimit dhe kushtet e punëtorëve. Ky shpenzim mund të ndikojë në kushtet e jetesës përmes blerjeve të qëndrueshme shoqërore dhe demonstrimeve të solidaritetit përmes mbështetjes për projektet e zhvillimit”, tha OJQ-ja në një deklaratë për shtyp, shkruan The Local.

Nëntëdhjetë e shtatë komuna nga e gjithë Zvicra morën pjesë në këtë renditje për të vlerësuar ndjenjën e tyre të solidaritetit dhe ndërgjegjes sociale në lidhje me blerjet e qëndrueshme.

Vlerësimi bazohet në një pyetësor të plotësuar nga bashkitë, që ka të bëjë veçanërisht me ekzistencën (ose jo) të kritereve sociale dhe ekologjike, organizimin e blerjeve të qëndrueshme, transparencën, si dhe kontributet në projektet e bashkëpunimit zhvillimor.

Kush fitoi?

Me 63 pikë nga 70, Cyrihu zuri vendin e parë. Pasohet nga Lozana (61 pikë), Illnau-Effretikon (57), Berna (56) dhe Bazel (55).

Edhe pse çështja e përgjegjësisë sociale po merret parasysh gjithnjë e më shumë gjatë prokurimit publik, “ekziston një potencial real për përmirësim”, vuri në dukje Solidar Suisse, përcjell albinfo.ch.

Kjo për shkak se vetëm 20 komuna nga 97 kanë marrë më shumë se gjysmën e pikëve, ndërsa 11 komuna nuk kanë marrë fare pikë.