Cilat vende në Ballkan po përballen me të nxehtit dhe zjarret

50 vatra zjarri gjatë 24 orëve në Shqipëri

Raportohet se qindra zjarrfikës dhe ushtarë po luftojnë kundër zjarreve në disa vende të Ballkanit. Gjatë ditëve në vazhdim këto vende do të jenë nën darën e të nxehtit, me temperatura rreth 40 gradë Celsius, përcjell albinfo.ch.

Sipas Ministrisë së Mbrojtjes së Shqipërisë, në vend ishin një duzinë vatrash aktive, pasi në 24 orët e fundit shpërthyen gati 50 vatra zjarri. Përkrah zjarrfikësve, sipas të dhënave zyrtare, janë angazhuar edhe rreth 800 ushtarë, si dhe avionë e helikopterë ushtarakë nga vendet fqinje. Në raportin 24-orësh janë evidentuar 50 vatra zjarri, 19 prej të cilave mbeten ende aktive.

Në Malin e Zi fqinj, forcat e emergjencës mbrojtën nga flakët dhjetëra shtëpi në periferi të Podgoricës. Zjarri kishte shpërthyer në një “terren mjaft të vështirë për t’u kaluar”, u tha gazetarëve drejtuesi i Agjencisë së Shpëtimit, Nikola Bojanovic. Gjatë pasdites së hënës, tymi dukej edhe në kodrat mbi Podgoricë.

Në Split të Kroacisë, gjatë natës drejt mëngjesit të së hënës, kanë qenë në terren rreth 150 zjarrfikës kundër një zjarri në pyll.

Vala e të nxehtit vazhdon me temperatura rreth 40 gradë

Ballkani dhe vendet në hapësirën e Mesdheut që nga korriku po përballen me të nxehtin ekstrem dhe zjarret në pyje. Në Shqipëri, që nga fillimi i korrikut, sipas Sistemit Europian të Informimit për Zjarret (EFFIS), janë djegur gati 34.000 hektarë tokë. Policia, në shumë raste, dyshon për zjarrvënie të qëllimshme dhe më shumë se 20 të dyshuar janë arrestuar.

Vala e të nxehtit në Ballkan do të zgjasë. Në Serbi, Bosnje dhe Kroaci, temperaturat pritet të arrijnë deri në 40 gradë Celsius.

---