Çka parasheh vendimi për ndalimin e burkas në Zvicër?

Ilustrim, Pixabay

Është përcaktuar në Zvicër zbatimi i ndalimit të mbulimit të fytyrës. Pas Dhomës së Kantoneve, edhe Dhoma Nacioanle e Parlamentit ka miratuar projektligjin përkatës

Nisma popullore e miratuar në vitin 2021 e ankoroi ndalimin në kushtetutë, pas së cilës Këshilli Federal paraqiti një projektligj në parlament, shkruan 20minuten.

Dhoma Nacionale ka miratuar draftin me 151 vota pro, 29 kundër dhe gjashtë abstenime. Të gjitha kërkesat e pakicave për ndryshime në formulimin, masën e gjobave dhe përjashtimet janë refuzuar.

Sipas ligjit të ri, ndalohet mbulimi i fytyrës në vende publike dhe private të hapura për publikun e gjerë në mënyrë që të mos duken tiparet e fytyrës. Shkelja mund të rezultojë në një gjobë deri në 1000 franga.

Megjithatë, ka përjashtime të ndryshme. Për shembull, ndalimi nuk zbatohet për shërbimet e kishës, zakonet lokale, shfaqjet teatrore ose mbulesat për të mbrojtur shëndetin ose për arsye klimatike, përcjell albinfo.ch.