Çka përfiton Kosova nga Plani evropian?

Ambasadori amerikan, Jeffrey Hovenier, theksoi se me planin evropian Kosova përfiton shumë gjëra, përcjell albinfo.ch.

“Marrëveshja sjell shumë gjëra për Kosovën. Aty janë një varg gjërash që ne mendojmë se janë në interes të Kosovës. Referenca për paprekshmërinë e kufijve, respektimi i integritetit dhe sovranitetit, mbrojtja e pakicave kombëtare”, është shprehur Hovenier.

“Pajtimi për të zhvilluar fqinjësi të mirë mbi bazën e të drejtave të barabarta, zotimi për njohjen e dokumenteve dhe simboleve kombëtare, përfshirë pasaportat, targat, vulat doganore, diplomat, respektimi i pavarësisë, e drejta e vetëvendosjes, mosmarrëveshjet do të zgjidhen përmes rrugëve paqësore pa përdorimin e forcës”, shtoi ai.

Ambasadori i SHBA-së tha se dëshiron të vërë në pah edhe paketën financiare që do ta përfitojnë Kosova dhe Serbia për zhvillimin e përbashkët ekonomik.

Hovenier tha po ashtu se qëndrimi i SHBA-së për Asociacionin nuk ka ndryshuar e as që do të ndryshojë.