Debat në Zvicër: Deputetët kritikojnë ushqimin e importuar për ushtrinë

Vendimi për të furnizuar ushtarët me ushqime kryesisht nga Estonia ka nxitur reagime të ashpra, me deputetët që kërkojnë mbështetje më të madhe për prodhuesit vendas

Vendimi i ushtrisë zvicerane për të furnizuar ushtarët me ushqime të importuara, kryesisht nga Estonia dhe pjesërisht nga Italia, ka shkaktuar reagime të forta në skenën politike, përcjell albinfo.ch.

Sipas autoriteteve ushtarake, kjo praktikë synon uljen e kostove, por një numër deputetësh e kanë kritikuar ashpër këtë qasje, duke argumentuar se po dëmton bujqësinë vendase.

Deputeti i Partisë së Qendrës, Markus Ritter, u shpreh i zhgënjyer nga ky vendim.

“Jemi shumë të zhgënjyer që ushqimi vendas nuk konsiderohet më mjaftueshëm i mirë për ushtrinë zvicerane”, tha ai.

Edhe deputeti i Partisë Popullore Zvicerane (SVP), Mauro Tuena, e cilësoi vendimin si një goditje për prodhuesit vendas.

“Shtimi i ushqimit estonez në menunë e ushtarëve zviceranë është asgjë më pak se një shuplakë për bujqësinë zvicerane dhe produktet e saj cilësore”, deklaroi Tuena.

Debati ka rikthyer në qendër të vëmendjes çështjen e mbështetjes së prodhuesve vendas dhe përdorimit të produktev e zvicerane në institucionet publike, veçanërisht në ushtri. /Albinfo.ch

---