Debat në Zvicër për burkinin, disa komuna sfidojnë ligjin e ri

Kundërshtime në Gjenevë ndaj ndalimit të burkinit në pishinat publike

Disa komuna argumentojnë se rregulli i ri bie ndesh me objektivat e shëndetit publik, pasi veshjet që mbulojnë trupin ndihmojnë në mbrojtjen nga rrezet e diellit dhe kanceri i lëkurës, përcjell albinfo.ch.

Po rritet rezistenca në kantonin e Gjenevës ndaj ligjit që ndalon përdorimin e burkinit në pishinat publike.

Sipas rregullores së re kantonale, veshjet e notit duhet të përfundojnë mbi gju dhe të lënë krahët të zbuluar. Kjo do të thotë se burkini, veshja e përdorur nga disa gra myslimane për të mbuluar pjesën më të madhe të trupit gjatë notit, nuk lejohet në pishinat publike.

Megjithatë, disa komuna të rëndësishme të kantonit po e kundërshtojnë këtë masë. Komunat e Vernier, Meyrin, Carouge, Lancy dhe vetë qyteti i Gjenevës kanë paraqitur kundërshtime zyrtare ndaj legjislacionit.

Sipas autoriteteve komunale, ndalimi nuk është në përputhje me objektivat e shëndetit publik. Ato argumentojnë se veshjet që mbulojnë trupin, si burkini, njihen si një mënyrë efektive për mbrojtjen nga ekspozimi i tepërt në diell dhe ndihmojnë në parandalimin e kancerit të lëkurës.

Kundërshtarët e ligjit vlerësojnë se rregullorja mund të kufizojë aksesin e disa grave në aktivitetet sportive dhe rekreative, ndërsa mbështetësit e saj argumentojnë se nevojiten standarde të njëjta për të gjithë përdoruesit e pishinave publike.

Debati pritet të vazhdojë edhe në muajt e ardhshëm, pasi çështja prek jo vetëm rregullat e pishinave, por edhe temat e integrimit, lirisë fetare dhe shëndetit publik./Albinfo.ch.

---