Deklaratat për Faton Hajrizin: Haxhiu thotë se reagoi pas takimeve me institucionet e sigurisë

Ministrja e Drejtësisë në Kosovës, Albulena Haxhiu është intervistuar për deklaratat e saj për Faton Hajrizin.

Ajo ka thënë se reagimi i saj ka ardhur pas takimeve me institucionet e sigurisë.

“Rasti i dytë ka të bëjë me një reagim timin në rrjetin social Facebook që vjen si kundërpërgjigje ndaj përpjekjes së radhës së Qeverisë së Serbisë, përmes ish-zëdhënësit të partisë së Sllobodan Millosheviqit, tash kryetarit të asaj partie dhe ministër i punëve të brendshme, Ivica Daciqit. I cili tentoi që ngjarjen që ka ndodhur në Lloznicë ta ndërlidhë me një sulm terrorist kinse të përgatitur nga qeveria e Kosovës”, tha ajo.

Tutje ka shtuar se pyetjet e prokurorisë ishin qëndrime të opozitës. “Më habit fakti se prokuroria zgjohet pas reagimit tim në rrjetin social sepse është dashur të jetë vixhilente ndaj tendencave të Serbisë për ta destabilizuar Kosovën dhe rajonin. Siç ishte rasti në Banjskë dhe ky i fundit në Ujman.”

Albulena Haxhiu përgjatë dy ditëve është intervistuar edhe për deklarimet e saj për kërkesat e prokurorëve dhe gjyqtarëve që sipas saj kanë pasur për takime dhe favore nga ajo. Ministrja e Drejtësisë për këtë tha se dikujt po i pengon reforma në drejtësi.