Delegacioni i Kosovës nis takimet në “Lutjet e Mëngjesit” në SHBA

Gjatë ditës se sotme deputetët bashkë me ministrin e Inovacionit, Besim Beqaj kanë zhvilluar një takim në Senat me përfaqësues të lartë të Senatit dhe të Shteteve nga Evropa Juglindore, në të cilin takim është diskutuar lidhur me sfidat e shteteve të Ballkanit Perëndimor dhe thellimin e bashkëpunimit me Senatin

Kanë filluar takimet e delegacioneve nga mbarë bota të cilët po marrin pjesë në “Lutjet e Mëngjesit” në Uashington të SHBA-së.

Kuvendin e Republikës së Kosovës në këtë eveniment po e përfaqësojnë deputetet Blerta Deliu-Kodra dhe Armend Zemaj, përcjell albinfo.ch.

Gjatë ditës se sotme deputetët bashkë me ministrin e Inovacionit, Besim Beqaj kanë zhvilluar një takim në Senat me përfaqësues të lartë të Senatit dhe të Shteteve nga Evropa Juglindore, në të cilin takim është diskutuar lidhur me sfidat e shteteve të Ballkanit Perëndimor dhe thellimin e bashkëpunimit me Senatin.

Takimet pritet të vazhdojnë edhe gjatë ditëve në vazhdim ku do të organizohet edhe ceremonia kryesore e Lutjeve te Mëngjesit, raporton televizioni publik i Kosovës.

Lutjet nacionale të Mëngjesit janë një traditë e vjetër, për më gjatë se gjashtë dekada, sipas të cilës, çdo vit, më 8 shkurt, në lutjet e përbashkëta mblidhen presidenti i Shteteve të Bashkuara të Amerikës, anëtarë të Kongresit, politikanë amerikanë dhe udhëheqës ushtarakë, si dhe mysafirë nga qindra vende të botës.

Lutja nacionale e mëngjesit është një manifestim që zgjatë disa ditë dhe tubon rreth 3.500 mysafirë. Aty zhvillohen takime të ndryshme, dreka e darka, por ngjarja kryesore është mëngjesi i të enjtes, kur aty do të flasë edhe presidenti i SHBA-së si dhe njëri nga mysafirët, por që identiteti i tij nuk bëhet publik në këtë fazë.