Dell: Nuk jam përgjegjës për zgjedhjen e Pacollit

Dell: "Personi më përgjegjësi pse Behgjet Pacolli është president sot, është duke ndenjur në qelinë e burgut në Hagë"

Ambasadori amerikan në Kosovë, Kristofer Dell, ka deklaruar se Ramush Haradinaj është personi më “përgjegjës” për zgjedhjen e Behxhet Pacollit President. Në një intervistë për Radion Evropa e Lirë, Dell ka mohuar të ketë pasur ndonjë rol në zgjedhjen e Presidentit të Republikës së Kosovës.

“Unë nuk kam pasur asnjë rol në zgjedhjen e presidentit. Mendoj se personi që mbase është më përgjegjësi pse Behgjet Pacolli është president sot, është duke ndenjur në qelinë e burgut në Hagë. Fakti që AAK-ja për arsye të veta zgjodhi të mos i bashkohet koalicionit qeverisës, e bëri pothuajse të pashmangshme që president u bë Behxhet Pacolli”, ka thënë Dell.

Duke folur rreth reagimeve të opozitës pas zgjedhjes së Pacollit për president, Dell thotë se nuk i takon atij që të flasë rreth çështjeve kushtetuese dhe nëse ka ndonjë problem në këtë drejtim, atëherë do të jetë Gjykata Kushtetuese ajo që vendos për këtë çështje.

“Opozita do t’i bënte nder vetes dhe Kosovës nëse vëmendjen e përqendron më pak te loja me fjalë për procedurat, e më shumë te sfidat e vërteta, me të cilat ky shtet duhet të përballet: sundimi i ligjit, korrupsioni, zhvillimi ekonomik dhe prodhimi, krijimi i vendeve të punës për njerëzit, kujdes më të mirë shëndetësor për të moshuarit, arsimi për fëmijët e Kosovës”, ka thënë ambasadori amerikan.

Ambasadori amerikan shprehet i kënaqur me formimin e një qeveri me “duar të pastra”, ashtu sikur kishte bërë thirrje vazhdimisht.