Deputetët duan kthimin e investimeve në Kosovë nga Fondi për Kursime Pensionale

Kuvendi i Kosovës ka filluar punën për këtë vit. Në seancën e parë kanë bërë betimin dy deputetë të rinj nga Lëvizja Vetëvendosje, Shemsi Syla dhe Sali Zyba.

Syla do të jetë në vend të Mytaher Haskukës, i cili tash është kryetar i Prizrenit dhe Sali Zyba në vend të deputetit Qëndron Kastrati, i cili tash është kryetar i komunës së Kamenicës, përcjell albinfo.ch.

Kryetari i Kuvendit, Kadri Veseli, ka kërkuar nga deputetët që të jenë më aktiv, në mënyrë që të përmbushin detyrimet që kanë.

Kuvendi i Kosovës ka miratuar Raportin e Institucionit të Avokatit të Popullit për vitin 2016.

Po ashtu ka miratuar Raportin Vjetor të Fondit të Kursimeve Pensionale të Kosovës për vitin 2016.

Kryetari i komisionit për Buxhet dhe Financa, Lumir Abdixhiku, tha se LDK-ja është kënaqur me mënyrën se si është menaxhuar ky fond.

E, Dardan Sejdiu nga VV-ja, tha se raporti i këtij fondi ka informata të mjaftueshme dhe të detajuara. Mirëpo, shtoi se ky fond do të duhet të trajtohej si investitor e jo si agjenci që menaxhon me paratë në mënyrë pasive. Por, deputetët kanë kërkuar kthimin e investimeve në Kosovë nga ky Fond.