Deputeti i LDK-së: Vetëvendosje i preferoi këto katër ministri

Deputeti i zgjedhur i LDK-së, Arben Gashi, në një intervistë është shprehur se LDK zgjodhi Ministrinë e Brendshme për të balancuar përgjegjësinë me Vetëvendosjen

Në një emision të RTV Dukagjinit, Gashi ka thënë se në LDK ka pasur dy rryma sa u përket negociatave me Vetëvendosjen.

“Njëra rrymë ka qenë që të shkohet në rrugë radikale dhe se posti i presidentit i takon LDK-së, ta propozojë dhe partneri i koalicionit duhet ta përkrahë në mënyrë absolute. Dhe, rryma tjetër kanë qenë shumicë, e cila ka thënë se kjo është çështje e formulimit gjuhësor dhe ne duhet ta ndërtojmë një partneritet qeverisës dhe problemi që do të vijë brenda 12 muajsh në tavolinë të mos jetë problem që e rrëzon qeverinë. Pra, të pajtohemi që LDK të ketë të drejtën e propozimit të presidentit me konfirmim nga Vetëvendosje”.

Po ashtu, ai ka thënë se Vetëvendosje nuk i la alternativa shumë LDK-së për të zgjedhur ministri, prandaj vendosën për Ministrinë e Punëve të Brendshme.

“Politika e jashtme është e lidhur direkt me kryeministrin. Qëndrimet politike të Albin Kurtit janë të lidhur kryesisht me politikën e jashtme, prandaj Ministrja e Jashtme automatikisht është menduar të shkojë te Kurti. Financat lidhen me kryeministrin dhe gjithë lufta e tij ka qenë për të kontrolluar financat. Ia kemi lënë atij edhe financat. Ministrinë e Zhvillimit Ekonomik ia kemi lënë atij [Kurtit], sepse ka menduar që e drejton më mirë. Kanë vlerësuar se kanë pasur sukses në shëndetësi në Komunë e Prishtinës, ia kemi lënë edhe Ministrinë e Shëndetësisë. A duhet të zgjedhim ne diçka?!”

Nga ana tjetër, ai ka thënë se në fushën e sigurisë kryeministri ka kompetenca të jashtëzakonshme, përfshirë emërimin e shefit të AKI-së, drejtorin e përgjithshëm të Policisë e persona të tjerë me rëndësi, prandaj, sipas tij, edhe LDK duhet të ketë ndonjë përgjegjësi në fushën e sigurisë, përcjell albinfo.ch.

 

---