Dëshmitari i mbrojtur: “Ibrahim Kelmendi, përgjegjës për vrasjen e Smail Hajdarajt dhe Tahir Zemës”

Kushtrim Mehmeti këto akuza i ka bërë si një person i dënuar me 30 vjet burg për vrasjen e policëve të Unmik-ut dhe si njëri ndër pjesëtarët e grupit të vrasësve, të cilit ai thotë se i kanë prirë vëllezërit Ibrahim dhe Qerim Kelmendi

Në një rrëfim ekskluziv që është emetuar sonte nga televizioni Klan Kosova, Kushtrim Mehmeti, dëshmitar i mbrojtur i Prokurorisë Speciale të Kosovës, ka drejtuar akuza të shumta për vrasjet e cilësuara si politike, që kanë ndodhur pas luftës në Kosovë.

Ai këto akuza i ka bërë si një person i dënuar me 30 vjet burg për vrasjen e policëve të Unmik-ut dhe si njëri ndër pjesëtarët e grupit të vrasësve, të cilit ai thotë se i kanë prirë vëllezërit Ibrahim dhe Qerim Kelmendi.

Konkretisht Mehmeti ka thënë se Ibrahim e Qerim Kelmendi janë përhgjegjës për vrasjen e deputetit të LDK-së, Smail Hajdaraj dhe të oficerit të FARK-ut, Tahir Zemaj.

Mehmeti ka thënë më tutje se vëllezërit Kelmendi kanë ngarkuar Florim Ejupin me detyrë për vrasjen e Xhavit Halitit, deputet i PDK’së – por se plani për vrasjen e tij ka dështuar

Ndërsa, sipas tij, veprimtarin e LDK-së, Xhemail Mustafa e ka vrarë Agron Sylejmani.

Lidhur me deklarimet e Kushtrim Mehmetit kanë reaguar Ibrahim e Qerim Kelmendi, ashtu sikurse edhe familjarë të veprimtarëve të vrarë pas luftës. Ibrahim Kelmendi në një intervistë dhënë gazetës “Express” ka thënë se “nuk ka pasur asnjë arsye konkrete, racionale, as kurrfarë të tjera, as private, të urdhëroj këdo qoftë për vrasjen e Ismail Hajdarit, sepse ai ishte vlerë e UÇK-së”.

Ndërsa për Tahir Zemajn, Kelmendi thotë: “përherë e kam urrejt si marionetë serbe, si narkodiler, si vrasës i dyshuar, si kriminel ordiner në Gjermani, si komplotist e diversionist gjatë Lufte, por nuk kam gjykuar se ia vlen të vritet, jo për shkak të ndonjë keqardhje, por për shkak të interesit nacional, meqë unë përherë kam vlerësuar, se më të fituar do të jemi nëse nuk fillojmë me vrasje konspirative, edhe kur e meritojnë të vriten”.

Fillimisht është menduar se Mehmeti do të flasë i maskuar, por ai ka kërkuar që këtë ta bëjë me zë dhe me fytyrë, pa u fshehur.