Dështim për herë të 39-të në Kuvend

Ngërçi institucional në Kosovë po thellohet. Tentimi i 39-të për konstituimin e Kuvendit të Republikës së Kosovës dështoi sërish sot, pasi deputetët nuk arritën të formojnë as Komisionin për votim të fshehtë, i cili është i nevojshëm për zgjedhjen e kryetarit të Kuvendit.

Në votimin për formimin e këtij komisioni morën pjesë vetëm 53 deputetë, një numër që nuk mjaftoi për ta bërë votimin të vlefshëm. Nuk pati vota kundër apo abstenime, ndërsa opozita refuzoi të marrë pjesë në proces.

Situata në sallën plenare u tensionua kur kryesuesi Avni Dehari ftoi partitë që të propozojnë emrat përbërës të komisionit. Deputetja e AAK-së, Time Kadrijaj, në një fjalë të drejtpërdrejtë nga foltorja, akuzoi deputetët pjesëmarrës si shkelës të Kushtetutës. Ndërkohë, deputetët e LDK-së protestuan duke goditur tavolinat gjatë votimit.

Seanca e sotme vjen një ditë pas një takimi të liderëve të partive parlamentare, i cili u mbajt me shpresën për një marrëveshje që do të zhbllokonte procesin konstituiv. Megjithatë, takimi nuk solli ndonjë rezultat konkret. Lëvizja Vetëvendosje, bashkë me Guxo dhe Alternativën, nuk i ka votat e mjaftueshme për ta zgjedhur Albulena Haxhiun kryetare të Kuvendit, dhe mungesa e konsensusit me opozitën po e zgjat krizën politike.

Ngërçi politik ka hyrë tashmë në muajin e tretë, që nga mbajtja e zgjedhjeve, duke e lënë vendin pa një Kuvend funksional dhe pa mundësinë për të formuar qeveri apo për të miratuar vendime të rëndësishme për qytetarët.