Dështon iniciativa për 140 km/h në autostradat e Zvicrës

Është shpallur e dështuar iniciativa “Tempo 140”, e cila kërkonte që në autorrugët e Zvicrës të lejohej shpejtësia prej 140 kilometrash në orë. Dështimi ka ardhur si rezultat i pamundësisë së këshillit iniciativ për të grumbulluar 100 mijë nënshkrime, brenda kohës që e përcakton procedura, deri më 20 nëntor.

Këshilli vlerëson se këtë barrierë nuk do të mund ta kalojnë deri në datën e përmendur, edhe pse siç thotë për sda.ch njëri nga iniciuesit, Marco Schläpfer, deri më tash janë grumbulluar rreth 95.000 nënshkrime. Sipas tij iniciativa nuk ka gjasa të pranohet për shkakun se edhe pas grumbullimit eventual të 100 mijë nënshkrimeve ato duhen verifikuar kështu që koha e mbetur nuk mjafton.

Për rritjen e shpejtësisë së lejuar të makinave nga 120 sa është tash në 140 kilometra në orë, ishte ngritur një këshill iniciues ku veç të tjerëve bënte pjesë edhe deputeti nacional i SVP-së, Lucas Reimann. Ndërsa e vetmja parti që i kishte ofruar mbështetje iniciativës ihste seksioni i të rinjve të SVP-së.