Dështon rezoluta e opozitës për vizat

Ka dështuar të votohet rezoluta e propozuar nga partitë opozitare LDK-ja dhe Vetëvendosje lidhur me dështimet e koalicionit qeverisës për liberalizimin e vizave.

42 deputetë kanë marrë pjesë në votim, 40 ishin pro, ndërsa 1 kundër e një abstenim. Kjo ka bërë të pamundur vendimmarrjen në Kuvend. Deputeti i LDK-së, Armend Zemaj, ka kërkuar nga Qeveria që të dalë me një qëndrim rreth lajmeve për tërheqjet e njohjeve që, sipas tij, janë shqetësuese dhe të dëmshme për shtetin e Kosovës, shkruan albinfo.ch

E shefi i Grupit Parlamentar të Lëvizjes Vetëvendosje, Glauk Konjufca, ka kritikuar Qeverinë për moszbatimin e pakos së reformave evropiane. Konjufca tha se kjo pako ka mbetur vetëm diskurs politik i thatë dhe elektoral.

Ai ka folur edhe për vizitën e fundit të komisarit Johanes Hahn në Kosovë, me ç’rast u shpreh se Hahn është dashur të shpallë pakon e dytë të agjendës së reformave, por në mungesë të impelemtimit të pakos së parë, nuk kishte mundur. Sipas tij, Kosova qëndron keq në secilën prej shtyllave që ka agjenda. Konjufca shtoi se nuk ka vullnet politik për luftimin e korrupsionit.