“Dialogu nuk është ofertë për BE-në”, thotë Fitou

Dialogu i nisur mes Kosovës dhe Serbisë ka të bëjë vetëm me zgjidhjen e problemeve konkrete të këtyre dy vendeve dhe nuk është i lidhur me procesin e integrimeve evropiane. Kështu ka thënë Ambasadori i Francës në Prishtinë, Jean François Fitou, në një debati me temën “Prezantimi i platformës për normalizimin e marrëdhënieve të Kosovës dhe Serbisë”, të mbajtur në Qendrën Mediale në Çagllavicë.

Fitou, ka thënë se dialogu është një proces më i ngushtë, me anë të të cilit dy vendet duhet të zgjidhin problemet konkrete, ndërsa procesi i integrimit kërkon përkushtime dhe angazhime më të gjera. “Dialogu nuk është kurrfarë oferte, nuk është tregti, por diçka tjetër. Thjesht është një proces i vullnetit të mirë i dy qeverive dhe i BE-së për të ndihmuar që jeta e njerëzve të rëndomtë të përmirësohet dhe të bëhet më e mirë. Pra, ne mund të mbështesim këtë, apo jo? Por mos të konsiderojmë dialogun si diçka tjetër, si një proces drejt Bashkimit Evropian. Mendoj që të gjithë duhet të jemi të vëmendshëm për këtë”, ka thënë Fitou.