“Die Weltwoche” nuk e kursen as Karin Keller-Sutter

Politikanja radikal-liberale sulmohet nga SVP-UDC

Revista “Die Weltwoche”, e cila është e afërt me SVP-UDC, në të njëjtin numër ku botoi një shkrim të ashpër ndaj kosovarëve në Zvicër, nuk e kurseu as këshitlltaren shtetërore aktuale të kantonit Sankt-Gallen, Karin Karin Keller-Sutter, duke e akuzuar atë për “abuzim të funksionit, favorizim, dhunim të ndarjes së pushteteve”.

Shtrohet pyetja se a ka të bëjë ky sulm në përgjigje të vlerësimit pozitiv që ia bënë asaj qytetarët zviceranë me botimin e sondazhit të së dieles së kaluar. Në fakt, Instituti  «Demoscope » botoi sondazhin në «SonntagsBlick”, ku ndër 16 politikanët zviceranë, liberal-radikalja Karin Karin Keller-Sutter gëzonte mbështetjen më të lartë nga 1002 qytetarë zviceranë, të pyetur në këtë sondazh për sa i përket aftësive të politikanëve për menaxhimin e çështjeve të imigracionit.

Pas Karin Keller-Sutter  radhitej këshilltarja federale socialiste, Simonetta Sommarugua, kurse kryetari i SVP-UDC, Toni Brunner, radhitej i fundit nga politikanët zviceranë, ose vetëm një vend më posht se mentori i tij politik, Christophe Blocher.

Vlen të shtohet se në sondazhin në fjalë SVP-UDC humbte mbi 4% të votave, respektivisht nga 28.9 (2007) ka rënë në 24.8%.