Diplomati i lartë amerikan nesër viziton Kosovën

Diplomati Hoyt Brian Yee, do të pritet nga presidenti Hashim Thaçi, pastaj do të zhvillojë një takim me kryetarin e Kuvendit, Kadri Veseli dhe me kryeministri Ramush Haradinaj. Ai sot po qëndron në Serbi

Zëvendës ndihmës sekretari amerikan i shtetit, Hoyt Brian Yee, nesër do të qëndrojë për një vizitë zyrtare në Kosovë. Ai do të ketë një agjendë të ngjeshur në Kosovë, i cili pritet të takohet me zyrtarë të lartë të shtetit, përfaqësues të shoqërisë civile dhe deputetë.

Fillimisht  diplomati Hoyt Brian Yee, do të pritet nga presidenti Hashim Thaçi, pastaj do të zhvillojë një takim me kryetarin e Kuvendit, Kadri Veseli dhe me kryeministri Ramush Haradinaj, njofton Ambasada e SHBA -ve në Prishtinë. Aktualisht Yee është duke qëndruar për vizitë në Serbi ku po zhvillon takime me krerë të lartë të këtij vendi.

Hoyt Yee një ditë më parë deklaroi se SHBA-të dëshirojnë një Ballkan stabil. Kurse sa i përket Serbisë, ai tha se Serbia duhet të dërgojë mesazh të qartë se dëshiron të bëhet pjesë e BE e jo të balancojë mes dy anëve.

Yee duke folur mbi gjendjen në Ballkanin Perëndimor ka thënë se SHBA dëshiron që këto vende të jenë stabile dhe të mos shkaktojnë probleme më vonë.

“Derisa ekzistojnë probleme të pazgjidhura ekzistojnë rrezik për konflikte, megjithatë trendi për paqe dhe stabilitet është akoma pozitiv”, ka thënë diplomati amerikan. Sipas tij, vizioni rus në Ballkan e rrezikon atë evropian.

“Në bazë të aktiviteteve ruse në rajon vlerësohet se ajo dëshiron që Ballkani të jetë i dobët dhe i ndarë e jo i fortë e i integruar në BE”, ka thënë Yee.