Drejtori i Policisë në Kosovë: Jemi të përgatitur për çdo skenar

Keystone (AP Photo/Dejan Simicevic)

Pas kërcënimeve të presidentit të Serbisë, Aleksandar Vuçiq, lidhur me arrestimin e zyrtarit serb Igor Popoviq në Kosovë, drejtori i Policisë së Kosovës, Gazmend Hoxha, deklaroi se Policia është e përgatitur për të gjitha sfidat që mund të ndodhin në vend në aspektin e sigurisë, raporton albinfo.ch.

Në një konferencë për media të mbajtur në Agjencinë e Menaxhimit të Emergjencave, Hoxha tha se situata e përgjithshme në vend është e qetë dhe stabile, me përjashtim të veriut të Kosovës, ku siguria mbetet e brishtë për shkak të veprimeve të grupeve kriminale serbe dhe ndërhyrjeve politike nga Beogradi.

“Ne i dimë qëllimet e politikës së Serbisë, nuk është që ndonjëherë kanë qenë në përkrahje të paqes dhe sigurisë në vendin tonë. Ne jemi të përgatitur për të gjitha sfidat që mund të ndodhin në Kosovë. Situata është e qetë dhe stabile përveç pjesës së Veriut, ku vazhdon të jetë e brishtë për shkak të veprimeve të politikës serbe dhe grupeve ekstremiste e terroriste,” deklaroi Hoxha.

Drejtori shtoi se nuk kishte nevojë të komentonte më shumë mbi kërcënimet e Vuçiqit, pasi, siç u shpreh ai, “qëllimet politike të Serbisë janë të njohura”.

Tensionet u rritën pas arrestimit të Igor Popoviqit, ndihmësdrejtor i së ashtuquajturës “Zyrë për Kosovën”, i cili u ndalua javën e kaluar në Hoçë të Rahovecit për deklarata nxitëse kundër Ushtrisë Çlirimtare të Kosovës.

Arrestimi i tij ngjalli reagime të ashpra në Beograd. Presidenti Vuçiq, në një intervistë për televizionin “Pink”, tha se veprimi i institucioneve të Kosovës përfaqësonte një provokim dhe akuzoi kryeministrin në detyrë, Albin Kurti, se po përpiqet të shkaktojë tensione dhe konflikte në Ballkanin Perëndimor.

“Arrestimi i fundit i Igor Popoviqit tregon se Kurti e ka humbur plotësisht arsyen dhe dëshiron të shkaktojë incidente. Ne kemi njoftuar partnerët ndërkombëtarë dhe pasojat mund të jenë të paparashikueshme,” deklaroi Vuçiq.

Ndërkaq, kryeministri në detyrë, Albin Kurti, reagoi të hënën duke i cilësuar deklaratat e Vuçiqit si “kërcënuese, destabilizuese dhe krejtësisht të papranueshme”, raporton albinfo.ch.