Drejtori i Policisë së Kosovës: Në sulmin e mbrëmshëm janë përdorur rreth 15-20 kilogramë eksploziv

Foto sc

Drejtori i Policisë së Kosovës, Gazmend Hoxha, në konferencën e jashtëzakonshme për media, pas sulmit të mbrëmshëm në kanalin e Ibër Lepencit në Zubin Potok, ka thënë se tri sulmet e fundit në veri janë kualifikuar si “sulme terroriste që kanë pasur synim ta cenojnë sigurinë e Kosovës”.

Sipas tij, vetëm në gjashtë muajt e fundit janë evidentuar gjashtë raste të shpërthimeve, në komunat me shumicë serbe në veri të vendit, teksa shtoi se ka qenë nga një grup i mirorganizuar, të cilët kanë njohuri në përdorimin e mjeteve shpërthyese.

Tutje, ai ka thënë se në këtë sulm është përdorur një sasi e konsiderueshme e eksplozivit, rreth 15 deri në 20 kilogramë.

“Më datën 29.11.2024, rasti i sulmit terrorist ndaj infrastrukturës kritike të Republikës së Kosovës kishte për shënjestër kanalin e Ibër Lepencit, i cili bën furnizimin e ujit të pijshëm të disa komunave, por edhe mbi të gjitha furnizimit të ujit të Termocentralit të Korporatës Energjetike (KEK). Për realizimin e këtij sulmi terrorist në bazë të hetimit të vendit të ngjarjes dyshohet se është përdorur një sasi e konsiderueshme e eksplozivit nga 15 deri në 20 kilogramë, e cila ka qenë e vendosur me një çantë të zezë, e u aktivizua me detonatorë mekanik përmes fitilit ndezës me djegie të ngadalshme. Si pasojë e këtij sulmi janë shkaktuar dëme të mëdha materiale në kanalet e Ibër Lepencit, si pasojë është ndërprerë furnizimi me ujë të pijshëm e duke rrezikuar edhe furnizimin me energji elektrike”, ka thënë ai, transmeton albinfo.ch.

Ministri i Punëve të Brendshme të Kosovës, Xhelal Sveçla, ka thënë se shumica e pajisjeve janë të prodhimit serb, por që disa pajisje janë ekskluzive ushtarake që nuk gjenden as në tregun e zi.

“Eksplozivi i përdorur mbrëmë është material që vështirë që gjendet, pos që furnizimet janë nga magazinat e ushtrisë. Ne besojmë se ato kanë dalë nga magazinat e ushtrisë së Serbisë. Policia e Kosovës do ta verifikojë këtë”, ka shtuar Sveçla.

Hoxha ka thënë se janë konfiskuar 200 uniforma ushtarake, raketahedhës e pajisje të tjera, që dyshohet se lidhen me sulmin e djeshëm terrorist dhe raste të mëhershme.