Dy rusë sulmojnë fizikisht familjen refugjate shqiptare

Disa persona kanë sulmuar mbrëmjen e të premtes një familje shqiptare në qendrën e azilit në Fichtelberg (qarku Bayreuth landi i Bavarisë). Me këtë rast një burrë 30 vjeçar ka marrë lëndime në kokë dhe në trup.

Ndërkohë policia ka arrestuar si të dyshuar për sulmin, dy meshkuj rusë, shkruan br.de. Sipas njohurive të deritashme të policisë, grupi i personave të përmendur e ka kërkuar familjen treanetarëshe shqiptare në qendrën e përmendur të azilit dhe me atë rast e ka rrahur kryefamiljarin 30 vjeçar. Ky i fundit ka pësuar lëndime në kokë dhe në pjesën e sipërme të trupit për çfarë i ëstë dashur të trajtohet në spital, transmeton albinfo.ch.

Sulmuesit i kanë shkaktuar lëndime të lehta me këtë rast edhe gruas së viktimës, shqiptares 24 vjeçare, e cila ka marrë ndihmën ambulantore të mjekut.

Personat që kishin sulmuar familjen shqiptare fillimisht kishin ikur. Më vonë policia ka arrestuar dy të dyshuarit rusë, njëri 24 dhe tjetri 37 vjeçar, njofton drejtoria e policisë në Oberfranken.