Dyshime se Ministria e Punëve të Brendshme e Serbisë po hap zyra paralele në veri të Kosovës

@albinfo.ch

Të dhënat e institucioneve në Kosovë kanë nxjerrë përfundim se Serbia ka nisur rihapjen e zyrave të Ministrisë së Punëve të Brendshme në Kosovë, përkatësisht në veri.

Radio Evropa e Lirë raporton se që nga 11 maji i këtij viti në Zveçan pranë shkollës “Vuk Karaxhiq” është hapur selia kryesore e MPB-së serbe. Edhe pse një gjë e tillë nuk është konfirmuar, ekziston dyshimi se edhe qendra të tjera do të hapen.

Sipas po të njëjtave të dhënave, ish-zyrtari i Policisë së Kosovës, Aleksandar Filipoviq, ka qenë në një takim të mërkurën, më 10 maj, në ambientet e Agjencisë së Informacionit (BIA) në Beograd.

Pas kësaj, me urdhër të Filipoviqit, një ish-zyrtar tjetër në Policinë e Kosovës, Goran Zhivkoviq, i njoftoi të gjithë ish-komandantët e stacioneve policore në komunat në veri se do të hapen dy zyra të MPB-së së Serbisë në Mitrovicën e Veriut, përcjell albinfo.ch.

Njëra zyrë në Mitrovicën e Veriut do të duhej të funksiononte në objektet e përdorura më parë nga MPB-ja e Serbisë, ndërsa tjetra në objektin e Autoritetit të Përkohshëm Komunal, i cili punon nën sistemin serb.

REL merr vesh që zyra të njëjta do të hapen edhe në Leposaviq dhe Zubin Potok dhe në Rudar afër Zveçanit.