E lë veturën në autolarje në Ferizaj, ia vjedh një “i afërm”

Policia e Kosovës ka bërë të ditur se të enjten në Ferizaj është vjedhur një veturë nga një autolarje.

Sipas njoftimit të policisë, ankuesi e kishte lënë veturën e tij me çelësa për ta pastruar në një auto-larje, ndërsa aty ishte prezantuar një person i panjohur si i afërm i pronarit të veturës dhe e ka marrë automjetin duke u larguar në drejtim të panjohur.

Ngjarja ka ndodhur mesditën e së enjtes në rrugën “Uran Tinova” në Ferizaj, transmeton Albinfo.ch.

Ndërkohë, sipas raportit të Policisë, dy persona janë arrestuar pasi janë kapur duke vjedhur në një market në Xërxe të Rahovecit, bën të ditur Policia e Kosovës përmes një komunikate për media. Ngjarja ka ndodhur dje rreth orës 21:30.

Gjithashtu policia ka njoftuar se është arrestuar dje një burrë në Shtime, i cili ka kryer një grabitje të armatosur në një kazino. Raportohet se i dyshuari ka grabitur portofolin me 5904 euro dhe tre telefona.