Edhe Driton Çaushi heq dorë nga funksionet në Vetëvendosje

Çaushi ka thënë se dorëheqja e tij është e parevokueshme, duke përmendur si një prej arsyeve fushatën linçuese ndaj tij si dhe grafitet në shtëpinë e tij nga grupi që mban tjetër anë

Deputeti i Lëvizjes Vetëvendosje, Driton Çaushi, i është bashkuar grupit të anëtarëve të dorëhequr nga pozitat drejtuese në këtë parti.

Përmes një postimin Facebook, Çaushi ka thënë se dorëheqja e tij është e parevokueshme, duke përmendur si një prej arsyeve fushatën linçuese ndaj tij si dhe grafitet në shtëpinë e tij nga grupi që mban tjetër anë.

“Më është thënë nga disa aktivistë që unë jam identifikuar si pjesë e grupit të Dardan Molliqajt. Edhe pas një viti nga fillimi i kësaj krize, e edhe pse e kam kërkuar, edhe nga Albin Kurti, unë ende nuk kam marrë asnjë shpjegim racional, të bazuar e të shëndoshë për një kualifikim të tillë. Asnjë shpjegim të denjë për një organizatë të emancipuar siç unë e njihja Lëvizjen Vetëvendosje!.

Ky animozitet ndaj meje ka vazhduar të rritet duke kulmuar në fushatën zgjedhore. Në fushatën e zgjedhjeve parlamentare në Qershor, kishte një antifushatë të qartë ndaj meje dhe Arbërie Nagavcit nga një grup i aktivistëve në Gjakovë”, ka shkruar ai.

Çaushi thotë se ka pak shpresë për një zgjidhje të problemit që ka kjo parti.