Edhe këtë vit, prindërit do të subvencionohen për tekstet shkollore të nxënësve

Ministria e Arsimit, Shkencës, Teknologjisë dhe Inovacionit

Ministrja e Arsimit, Shkencës, Teknologjisë dhe Inovacionit, Arbërie Nagavci, së bashku me zëvendësministrin Taulant Kelmendi dhe Këshilltarin e lartë politik, Muhedin Nushi, kanë mbajtur sot konferencë për media, në lidhje me përgatitjet e vitit të ri shkollor 2024/25 dhe subvencionimin e teksteve mësimore.

Ministrja e Arsimit tha se nesër do të hapet platforma për aplikim për subvencionimin e teksteve dhe mjetet mësimore. Përtej kësaj tha se procesi i subvencionimit të teksteve dhe mjeteve mësimore është plotësisht transparent, i cili e shmang mundësinë e çfarëdo keqmenaxhimi apo keqplanifikimi që ka ndodhur në të kaluarën.

Nagavci tutje tha se këtë vit për nxënësit nga klasa e 1-5 subvencionimi do të bëhet me nga 80 euro, ndërsa për nxënësit nga klasa 6-9 subvencionimi do të jetë me nga 110 euro.

Ministrja Nagavci tha se kemi ndarë me kohë katalogun e teksteve shkollore te komunat dhe Drejtoritë Komunale të arsimit tashmë e kanë sjellë listën e teksteve të miratuara. Këto lista do të publikohen në ueb faqen e ministrisë dhe të publikohen në vende të dukshme në shkolla.

Përveç blerjes së teksteve mësimore, do të subvencionohet edhe blerja e materialeve të tjera shkollore, në mënyrë që procesi i mësimnxënies të jetë sa më cilësor. Ai tha se është viti i dytë që MASHTI po subvencionon edhe për mjete shkollore, që është obligim ligjor për një qasje sa më të barabartë për të gjithë nxënësit brenda sistemit arsimor.