Edhe Kosova, e gatshme për dozën e tretë të vaksinës

Keystone 2020

Në fillim të vitit të ardhshëm ka gjasa të fillojë dhënia e dozës së tretë të vaksinës anti-COVID në Kosovë.

Një gjë e tillë është pohuar nga Ministria e Shëndetësisë. Nga kjo ministri kanë thënë se nuk do të jetë problem sigurimi i vaksinave për administrimin e një doze shtesë.

Kosova ka filluar përgatitjet për administrimin e dozës së tretë të vaksinës anti-COVID.

Derisa shtete të tjera tashmë kanë filluar vaksinimin e një pjese të popullsisë me dozën e tretë të vaksinës, nga Ministria e Shëndetësisë kanë thënë për Express se edhe ekipet e vaksinimit në vend janë të përgatitura në çdo kohë që të administrojnë edhe dozën e tretë.

Ndërsa, të pyetur se a do të mund të vaksinohen qytetarët me dozën e tretë gjatë fillimit të vitit të ardhshëm, nga MSH kanë thënë se ka gjasa që kjo të ndodhë.

“Aplikimi i dozës së tretë të vaksinës kundër COVID-19, nuk ka ndonjë procedurë tjetër, pra është proces i ngjashëm me aplikimin e dozës së parë dhe të dytë. Dallimi qëndron se disa shtete të cilat kanë filluar ta japin dozën e tretë, këtë e bëjnë tek grupe të caktuara të popullatës si të moshuarit, punëtorët e kujdesit shëndetësorë apo ndonjë kategori tjetër që ka imunitet të komprometuar. Ekipet e vaksinimit janë të përgatitura në çdo kohë që ta administrojnë edhe dozën e tretë. Sigurisht që ka gjasa që kjo dozë të administrohet në kohën e përmendur nga ju”, kanë thënë zëdhënës për informim.

Nga MSH kanë thënë se vendimin për dhënien e dozës së tretë do ta marrin në kohën e duhur.