Edhe një grua vdes nga dhuna në familje, reagon rrejti i Grave

“RrGK kërkon nga organet e drejtësisë të reagojnë sa më shpejtë në hetimin dhe zbardhjen e rastit. Kryesit e dhunës dhe vrasësit duhet të dënohen për krimet e shkaktuara në pajtim me ligjin”, thuhet në reagim

Rrejti i Grave të Kosovës ka ngritur sërish zërin kundër dhunës në familje, ndërsa njoftoi sërish një grua shqiptare është vrarë nga bashkëshorti i saj. Ky reagim i Rrjeti i Grave të Kosovës (RrGK) vjen në ditën kur vëmendja e tërë botës është në luftimin e dhunës ndaj grave.

“Pas komunikimit me Mbrojtësin e Viktimave në Pejë, RrGK u informua se kemi të bëjmë me një vrasje në tentativë” njofton RrGK.

Bashkëshorti i saj, sipas këtij rrjeti, kishte ushtruar dhunë ndaj bashkëshortes, e cila si pasojë e lëndimeve të rënda nuk ka arritur të jap deklaratën e saj në polici, pasi që ajo është dashur të dërgohet menjëherë në Qendrën Klinike Universitare të Kosovës për trajtim mjekësor.

“Aty edhe ndërroi jetë. Përveç të ndjerës, e lënduar ishte edhe bashkëshortja e djalit të tyre, e cila po ashtu ishte dërguar për trajtim mjekësor”, thuhet në reagim.

Sot, kur fillojnë “16 ditët e aktivizimit kundër dhunës ndaj grave”, RRGK u bënë thirrje të gjitha institucioneve që të merren seriozisht me dhunën dhe vrasjet që po bëhen ndaj grave.

“RrGK kërkon nga organet e drejtësisë të reagojnë sa më shpejtë në hetimin dhe zbardhjen e rastit. Kryesit e dhunës dhe vrasësit duhet të dënohen për krimet e shkaktuara në pajtim me ligjin”, thuhet në reagim.