Edhe një kanton kërkon hapjen e restoranteve më 1 mars

Qeveria e Appenzell Innerrhoden: "Situata aktuale lejon hapjen e restoranteve. Ky hap është i mundur dhe korrekt nëse respektohen konceptet e mbrojtjes"

Pas Kantonit të Graubündenit dhe atij të Vaudit, edhe një kanton tjetër kërkon hapjen e restoranteve më herët se që është rekomadnuar nga qeveria federale.

Kështu, qeveria e kantonit malor në Zvicrën lindore, Appenzell Innerrhoden është duke bërë presion që restorantet të hapen më 1 mars, raporton srf.ch.

Ajo i kërkon Këshillit Federal të hapë ambientet e brendshme dhe të jashtme të restoranteve në këtë datë, transmeton albinfo.ch. Qeveria e kantonit pajtohet vetëm pjesërisht me zbutjen e propozuar nga Këshilli Federal i masave, njoftoi zyra e këshillit të kantonit.

Pasi numri i infeksioneve të reja ka rënë në muajt e fundit, Këshilli Federal po propozon një hapje të kujdesshme, graduale. Por, masat nuk janë të mjaftueshme, sipas ekzekutivit të kantonit. Situata aktuale lejon hapjen e restoranteve, thuhet më tutje në njoftim. Ky hap është i mundur dhe korrekt nëse respektohen konceptet e rrepta të mbrojtjes.

Qeveria kantonale gjithashtu kërkon të rritet kufiri i moshës në fushën e sportit dhe kulturës nga 18 në 20 vjeç, përcjell albinfo.ch. Kjo, veçanërisht pasi kufiri i moshës prej 20 vjet korrespondon më shumë aktivitete e rinisë dhe sportit.

Përveç kësaj, Këshilli Federal duhet të zhvillojë shpejt një strategji të hapjes, e cila do të shtrihej përtej verës së 2021.

---