Edhe takimi i radhës mes Kurtit dhe Abdixhikut për presidentin, pa rezultate

Pas përfundimit të takimit, Kurti u prononcua shkurt para gazetarëve, duke thënë: “Kur të kemi rezultate nga ana jonë, do të kemi lajme edhe për ju”

Kryetari i Lëvizjes Vetëvendosje, kryeministër në detyrë, Albin Kurti, dhe kryetari i Lidhjes Demokratike të Kosovës, Lumir Abdixhiku, janë takuar sërish sonte për të diskutuar rreth çështjes së zgjedhjes së presidentit të Kosovës.

Takimi, i cili zgjati më shumë se dy orë, u zhvillua në ambientet e Kuvendit të Kosovës, raporton rtklive.com. Pas përfundimit të takimit, Kurti u prononcua shkurt para gazetarëve, duke thënë: “Kur të kemi rezultate nga ana jonë, do të kemi lajme edhe për ju”.

Ky ishte takimi i dytë mes Kurtit dhe Abdixhikut brenda kësaj jave, pas atij të së mërkurës, ku liderët e dy partive u përpoqën të gjenin një marrëveshje për zgjedhjen e presidentit të ri, me synim tejkalimin e krizës institucionale.

Pas takimit të së mërkurës, të dy liderët kishin deklaruar se për herë të parë kishin diskutuar për “emra konkretë” për presidentin e ardhshëm të Kosovës, por pa bërë publikë emrat e diskutuar.

---