Edhe Zvicra po përballet me problemin e ujit

(KEYSTONE/Anthony Anex)

Një numër në rritje i komunave kanë kufizuar përdorimin e ujit, pasi pjesë të mëdha të Zvicrës përballen me valën e të nxehtit.

Rajonet në pjesët lindore dhe perëndimore të vendit njoftuan një ndalim të pompimit të ujit nga lumenjtë, përrenjtë dhe pellgjet.

Disa kanë ndaluar gjithashtu mbushjen e pishinave private, përdorimin e spërkatësve të ujit apo larjen e veturave, shkruan Swissinfo.ch.

Disa pjesë të lumit Rhine dhe liqenit të Konstancës janë mbyllur për shkak të niveleve të ulëta të ujit.

Autoritetet gjithashtu kanë këshilluar njerëzit që të përmbahen nga ndezja e zjarrit në pyje.

Qeveria zvicerane paralajmëroi për probleme shëndetësore, veçanërisht për të moshuarit në rajonet jugore, për shkak të valës së të nxehtit.

Temperaturat maksimale arritën 38.1°C (100.5°F) në Gjenevë të martën, ndërsa qyteti i Bazelit regjistroi 36.5°C, sipas MeteoSwiss, agjencia shtetërore e motit.

Kjo është më pak se 39.7°C e matur në Gjenevë shtatë vjet më parë dhe 41.5°C në Zvicrën jugore, në vitin 2003.