Elza Maxhuni nga Grazi publikon projektin muzikor „Merci”

Se gjeneratat e reja në Austri nuk rrinë duarkryq kur është në pyetje muzika, tregon më së miri rasti i Elza Maxhuni.

Talentja e re shqiptare me emrin artistik Elevan para pak ditësh publikoi projektin e dytë muzikor „Merci“ të kontraktuar nga shtëpia muzikore „Sony Austria“, shkruan Albinfo Austria.

Këngë është duke u pritur mjaft mirë nga fansat e saj dhe të rrymës muzikore “Rap”. Për projektin e Elzës kanë shkruar edhe mediat gjermanofolëse jo vetëm në Austri, por edhe në Gjermani.

Portalet gjermane si: „16BARS“ dhe „NOIZZ“ e përshkruajnë bukuroshen shqiptare jo vetëm si këngëtare me perspektivë, por edhe si një biznesmene të suksesshme të dyqanit të saj kozmetik “Eleven Cosmetics” në Garz. E pyetur se përse kënga është titulluar “Merci”, këngëtarja me prejardhje nga Vushtrria ka thënë se këtë këngë e ka bërë për të falënderuar të gjithë simpatizuesit e saj, të cilët e përkrahen që nga e dita e parë e karrierës së saj.

Edhe pse e lindur në Graz dhe e re në moshë, ajo synon të lë gjurmë jo vetëm në biznes, por edhe në botën muzikore duke u bërë shembull i një shqiptareje ambicioze.

Së shpejti Elza Maxhuni do të publikojë edhe dy këngë të reja.

---