Emisarët shprehin brengosjen e Berlinit dhe Parisit për specialen

Presioni ndërkombëtar ndaj liderëve të Kosovës vazhdon të rritet për të mos e zhbërë ligjin për Gjykatën Speciale.

Dy zyrtarë të Ministrisë së Punëve të Jashtme të Gjermanisë dhe Francës kanë vazhduar takimet mbrëmë dhe sot me përfaqësues të partive politike. Ky delegacion është pritur edhe nga Grupi Parlamentar i Lidhjes Demokratike të Kosovës, përcjell albinfo.ch.

Në njoftimin e LDK-së thuhet se dy emisarët shprehën brengosjen e thellë të Berlinit dhe Parisit për këtë mundësi.

Ndërsa, Avdullah Hoti e ka thënë se tendenca për shfuqizimin e  Ligjit për Specialen dëmton subjektivitetin ndërkombëtar të Kosovës.

“Hoti i siguroi emisarët se Lidhja Demokratike e Kosovës e sheh jetike për vendin ruajtjen e raporteve dhe të miqësisë me shtetet mike. LDK-ja në asnjë rast nuk do të jetë pjesë e veprimeve të pamatura dhe nuk do të lejojë që fati i qytetarëve dhe i vendit tonë të futet në rrugë të paqarta”, thuhet në njoftim.