Escobar e Lajçak, në përpjekje për shtensionim të situatës në veri

Emisari special i SHBA-së për Ballkanin Perëndimor, Gabriel Escobar, i shoqëruar nga përfaqësuesi special i BE-së për dialogun Kosovë-Serbi, Miroslav Lajçak, po qëndrojnë në Prishtinë.

Rreth një orë më parë ata kanë nisur takimin me kryeministrin e Kosovës, Albin Kurti, në dritën e tensioneve të fundit të krijuara në veri.

Sipas agjendës, nesër në orët e mëngjesit ata do të takojnë edhe presidenten e Kosovës, Vjosa Osmani. Ndërsa më pas do të vizitojnë edhe Beogradin, ku do të kenë edhe atje takime me zyrtarë shtetërorë, shkruan albinfo.ch.

Vizita e tyre vjen një javë pas përshkallëzimit të situatës në komunat veriore të Kosovës, ku pati edhe sulme ndaj KFOR-it, Policisë së Kosovës e mediave nga grupe të organizuara, për të cilat u tha se janë të nxitura nga Serbia, përcjell tutje albinfo.ch.

Pritet të shihet nëse pas këtyre takimeve palët do të zbusin qëndrimet në raport me kërkesat e paraqitura nga ndërkombëtarët. Mes tjerash, opsioni i zgjedhjeve të reja është përmendur si mundësi për shtensionim të situatës.